🦋 ധ്യാനം - 2 രാജാക്കന്മാർ 18 : 7

 ആദവൻ ധ്യാനം                                                                        നമ്പർ :- 2059 - തീയതി :- 28.09.2026                                                                                                     

"അതുകൊണ്ട് യഹോവ അവനോടുകൂടെ ഉണ്ടായിരുന്നു; അവൻ പോകുന്നിടത്തെല്ലാം അവന് അഭിവൃദ്ധിയുണ്ടായി." ( 2 രാജാക്കന്മാർ 18 : 7 )

ജീവിതത്തിൽ നാം എടുക്കുന്ന ശ്രമങ്ങളും നമ്മുടെ പ്രയത്നങ്ങളും നമുക്ക് അനുകൂലമായി തീരണമെങ്കിൽ യഹോവ നമ്മോടുകൂടെ ഉണ്ടാകേണ്ടത് അത്യന്താപേക്ഷിതമാണ്. അവിടുന്ന് നമ്മോടുകൂടെ ഉണ്ടെങ്കിൽ, നമ്മുടെ അനാവശ്യ ശ്രമങ്ങളെ തുടക്കത്തിൽത്തന്നെ നമ്മെ ബോധ്യപ്പെടുത്തി അവയിൽനിന്ന് നമ്മെ പിന്തിരിപ്പിക്കും; അവിടുത്തേക്ക് പ്രസാദമുള്ള കാര്യങ്ങളെ നമുക്ക് അനുകൂലമാക്കിത്തീർക്കുകയും ചെയ്യും.

അതെ പ്രിയമുള്ളവരേ, ചില കാര്യങ്ങൾ നമ്മുടെ കാഴ്ചപ്പാടിൽ നല്ലതായി തോന്നും. നല്ല കാര്യങ്ങളാണെങ്കിൽപ്പോലും, ചില സമയങ്ങളിൽ മറ്റുള്ളവരെപ്പോലെ ആ കാര്യങ്ങൾ ചെയ്യാൻ ദൈവം നമ്മെ അനുവദിക്കാറില്ല. അല്ലെങ്കിൽ ഒരു നിശ്ചിത കാലത്തേക്ക് അത് തടയും. ഇത് ആത്മീയ ജീവിതത്തിലെ ഒരു രഹസ്യമാണ്. ദൈവവചനം മറ്റുള്ളവരുമായി പങ്കുവെക്കുന്നത് നല്ലൊരു കാര്യമാണ്. എന്നാൽ ചിലപ്പോഴൊക്കെ ദൈവം അതിനെയും തടയാറുണ്ട്. "അവർ ഫ്രുഗ്യയിലും ഗലാത്യ പ്രദേശത്തിലും സഞ്ചരിച്ചശേഷം, ആസ്യയിൽ വചനം പ്രസംഗിക്കരുതെന്ന് പരിശുദ്ധാത്മാവ് തടയുകയാൽ," ( പ്രവൃത്തികൾ 16 : 6 ) എന്ന് നാം വായിക്കുന്നു.

എന്നാൽ യഹോവയ്ക്ക് പ്രസാദമുള്ള ജീവിതം നയിക്കുമ്പോൾ അവിടുന്ന് നമ്മോടുകൂടെത്തന്നെ ഉണ്ടാകും. ഹിസ്കീയാ രാജാവ് യഹോവയ്ക്ക് പ്രസാദമുള്ള കാര്യങ്ങൾ ചെയ്യുകയും യഹോവയെപ്പോലെ ആശ്രയിച്ചു ജീവിക്കുകയും ചെയ്തതിനാൽ, യഹോവ അവനോടുകൂടെ ഉണ്ടായിരുന്നു. അവൻ പോകുന്നിടത്തെല്ലാം അവന് വിജയമുണ്ടായി. ഈ ഹിസ്കീയാ "വാഴ്ച തുടങ്ങിയപ്പോൾ ഇരുപത്തഞ്ചു വയസ്സുള്ളവനായിരുന്നു; അവൻ ഇരുപത്തൊമ്പതു സംവത്സരം യെരൂശലേമിൽ വാണു." ( 2 രാജാക്കന്മാർ 18 : 2 ) എന്ന് നാം വായിക്കുന്നു. ഇരുപത്തഞ്ചാം വയസ്സിൽത്തന്നെ ഹിസ്കീയാ യഹോവയെ അറിയുകയും അവിടുത്തേക്ക് പ്രസാദമുള്ളവനായി ജീവിക്കാൻ തന്നെത്തന്നെ സമർപ്പിക്കുകയും ചെയ്തു.

ഹിസ്കീയാവിന് മുമ്പ് യെഹൂദ ഭരിച്ച പല രാജാക്കന്മാരും യഹോവയെ വിട്ട് പിന്മാറിപ്പോയ ജീവിതമാണ് നയിച്ചത്. എന്നാൽ ഇരുപത്തഞ്ചാം വയസ്സിൽ ഭരണം ഏറ്റെടുത്ത ഹിസ്കീയാ യഹോവയോട് വിശ്വസ്തതയുള്ളവനായി ജീവിച്ചു. "അവൻ യഹോവയോടു ചേർന്നിരുന്നു, അവിടുത്തെ വിട്ടുമാറാതെ യഹോവ മോശെയോടു കൽപ്പിച്ച കൽപ്പനകളെ പ്രമാണിച്ചുപോന്നു." ( 2 രാജാക്കന്മാർ 18 : 6 ) എന്ന് നാം വായിക്കുന്നു.

അതുകൊണ്ടാണ് നമ്മുടെ കർത്താവായ യേശുക്രിസ്തുവും, "എന്നിൽ വസിപ്പിൻ, ഞാൻ നിങ്ങളിലും വസിക്കും. ശാഖയ്ക്ക് മുന്തിരിവള്ളിയിൽ വസിച്ചിട്ടല്ലാതെ സ്വയമായി കായ്പാൻ കഴിയാത്തതുപോലെ, നിങ്ങളും എന്നിൽ വസിച്ചിട്ടല്ലാതെ നിങ്ങൾക്കു കഴിയുകയില്ല." ( യോഹന്നാൻ 15 : 4 ) എന്ന് അരുളിച്ചെയ്തത്. നാമും കർത്താവായ യേശുക്രിസ്തുവിനോട് ചേർന്നിരുന്നാൽ, നാം പോകുന്നിടത്തെല്ലാം നമ്മുടെ ആത്മീയ ജീവിതം നമുക്ക് വിജയമായിത്തീരും. ആത്മീയ ഫലങ്ങൾ നിറഞ്ഞവരുമായിരിക്കും.

നാം വെറുതെ ഒരു ഭക്തിജീവിതം നയിക്കാൻ മാത്രമല്ല വിളിക്കപ്പെട്ടിരിക്കുന്നത്; മറിച്ച്, ഫലം കായ്ക്കുന്ന ഒരു ജീവിതം നയിക്കാനാണ് വിളിക്കപ്പെട്ടിരിക്കുന്നത്. നാം നട്ടുനനച്ച് വളർത്തുന്ന ഒരു വൃക്ഷം വർഷങ്ങൾ പലത് കഴിഞ്ഞിട്ടും ഫലം തരുന്നില്ലെങ്കിൽ, അതുകൊണ്ട് നമുക്ക് എന്ത് പ്രയോജനം? ഫലമുള്ള ഒരു ജീവിതമില്ലെങ്കിൽ നാമും അതുപോലെ പ്രയോജനമില്ലാത്തവരായി മാറും.

മാത്രമല്ല, കർത്താവായ യേശുക്രിസ്തുവിനോട് ചേർന്ന് അവിടുത്തേക്ക് പ്രസാദമുള്ള ജീവിതം നയിക്കുമ്പോൾ നമ്മുടെ പ്രാർത്ഥനകളും അവിടുന്ന് കനിവോടെ കേട്ട് മറുപടി നൽകും. ഹിസ്കീയാവിനോടുകൂടെ യഹോവ ഉണ്ടായിരുന്നതിനാൽ അവന്റെ പ്രാർത്ഥന കേട്ട് യെശയ്യാ പ്രവാചകൻ മുഖാന്തരം താൻ അരുളിച്ചെയ്ത വാക്കുകളെപ്പോലും യഹോവ മാറ്റി. നീ മരിച്ചുപോകുമെന്ന് ആദ്യം പറഞ്ഞിരുന്നെങ്കിലും താൻ എടുത്ത തീരുമാനം മാറ്റി, ഹിസ്കീയാവിന് 15 വർഷംകൂടി ആയുസ്സ് നീട്ടിക്കൊടുത്ത് അവിടുന്ന് അവനെ സന്തോഷിപ്പിച്ചു.

ഹിസ്കീയാ പ്രാർത്ഥിച്ചപ്പോൾ, താൻ യഹോവയ്ക്ക് വിശ്വസ്തനായിരുന്ന കാര്യം അവിടുത്തെ ഓർമ്മിപ്പിച്ചു. "അയ്യോ യഹോവേ, ഞാൻ അവിടുത്തെ തിരുമുമ്പിൽ വിശ്വസ്തതയോടും പൂർണ്ണഹൃദയത്തോടും കൂടെ നടന്ന് അവിടുത്തേക്ക് പ്രസാദമുള്ളത് ചെയ്തിരിക്കുന്നു എന്ന് ഓർക്കേണമേ എന്ന് അപേക്ഷിച്ചു; ഹിസ്കീയാ ഏറേ കരഞ്ഞു." ( 2 രാജാക്കന്മാർ 20 : 3 ) എന്ന് രേഖപ്പെടുത്തിയിരിക്കുന്നു.

നാമും ഇതുപോലെ നമ്മുടെ സാക്ഷ്യമുള്ള ജീവിതത്തെ ദൈവസന്നിധിയിൽ എടുത്തുപറഞ്ഞ് പ്രാർത്ഥിക്കാൻ ധൈര്യമുള്ളവരായി ജീവിക്കുകയാണെങ്കിൽ യഹോവ നമ്മോടുകൂടെ ഉണ്ടാകും; നാം ഫലം കായ്ക്കുക മാത്രമല്ല, ദൈവത്തിൽനിന്ന് നന്മകളെ പ്രാപിച്ചെടുക്കാനും നമുക്ക് സാധിക്കും.

✒ സഹോദരൻ എം. ജിയോ പ്രകാശ് ✒️