🦋 Meditation verse - எபேசியர் 5 : 14 / Ephesians 5:14

 "விதைகளின் உள்ளே" 🌳 

வேதாகமத் தியானம் எண் - 1718                                          ஆதவன் 21.10.2025 செவ்வாய்   

"ஆதலால், தூங்குகிற நீ விழித்து, மரித்தோரை விட்டு எழுந்திரு, அப்பொழுது கிறிஸ்து உன்னைப் பிரகாசிப்பிப்பாரென்று சொல்லியிருக்கிறார்." ( எபேசியர் 5 : 14 )

ஆவிக்குரிய சிந்தனையே இல்லாமல் உலக காரியங்களையே எண்ணி அவற்றுக்காகவே உழைத்துக் கொண்டிருந்தோமானால் நாம் இருளடைந்தவர்களாக இருப்போம். நம்மைக்கொண்டு யாருக்கும் எந்த பயனுமிராது. ஆத்தும காரியங்களைக்குறித்து எந்தவித சிந்தனையுமில்லாமல் உலக காரியங்களையே எண்ணி வாழ்வதை தூக்கம் அல்லது செத்துப்போன வாழ்க்கை என்று அப்போஸ்தலரான பவுல் குறிப்பிடுகின்றார். இப்படி மரித்தவன்போல வாழும் நீ உனது தூக்கத்தைவிட்டு எழுந்திருந்தால் கர்த்தர் உன்னைப் பிரகாசிக்கச் செய்வார் என்று கூறுகின்றார் அவர். 

உலக காரியங்களில் அதிகமான தூக்கம் மனிதனின் வாழ்வை நாசமாக்கும். தூங்குவதற்கு முக்கியத்துவம் கொடுத்து நமது அன்றாட வேலைகளைச் செய்யாமலிருந்தால் தரித்திரம்தான் நம்மைத் தொடரும். " ................ தூக்கம் கந்தைகளை உடுத்துவிக்கும்." ( நீதிமொழிகள் 23 : 21 ) என்கின்றது நீதிமொழிகள். அதாவது சோம்பலாய் தூக்கத்திலேயே நாட்டம்கொண்டு இருப்போமானால் உடுத்துவதற்கு நல்ல ஆடை கூட இல்லாத நிலைமை ஏற்பட்டு கந்தலைக் கட்டிக்கொண்டு திரியவேண்டியிருக்கும்.

இதுபோலவே ஆவிக்குரிய வாழ்விலும் கிறிஸ்துவுக்குரிய நாமோ தூங்குவதற்கல்ல, மாறாக விழித்திருந்து செயல்படவும் அவர் வரும்போது அவரை எதிர்கொண்டுச் செல்லத் தகுதியுள்ளவர்களாகவும் வாழவேண்டியது அவசியம். எனவேதான் இயேசு கிறிஸ்துக் கூறினார், "அப்படியே நீங்களும் விழித்திருங்கள்; ஏனெனில், வீட்டெஜமான் சாயங்காலத்திலோ, நடுராத்திரியிலோ, சேவல் கூவும் நேரத்திலோ, காலையிலோ, எப்பொழுது வருவான் என்று நீங்கள் அறியீர்கள்." ( மாற்கு 13 : 35 )

ஆவிக்குரிய எண்ணமில்லாமல் இருப்பவர்களை அப்போஸ்தலரான பவுல் இரவுக்குரியவர்கள் என்றும் ஆவிக்குரிய வாழ்க்கை வாழ்பவர்களை பகலுக்குரியவர்கள் என்றும் கூறுகின்றார். "தூங்குகிறவர்கள் இராத்திரியிலே தூங்குவார்கள்; வெறிகொள்ளுகிறவர்கள் இராத்திரியிலே வெறிகொள்ளுவார்கள். பகலுக்குரியவர்களாகிய நாமோ தெளிந்தவர்களாயிருந்து, விசுவாசம் அன்பு என்னும் மார்க்கவசத்தையும், இரட்சிப்பின் நம்பிக்கையென்னும் தலைச்சீராவையும் தரித்துக்கொண்டிருக்கக்கடவோம்." ( 1 தெசலோனிக்கேயர் 5 : 7, 8 ) என்கின்றார். 

ஆவிக்குரிய எண்ணமில்லாமல் வாழ்வது உயிருடன் இருந்தும் மரித்துப்போன வாழ்க்கை வாழ்வதற்குச் சமம். எனவே, ஆவிக்குரிய தூக்கத்தில் இருக்கின்ற நாம் விழித்து, மரித்தோரை விட்டு எழுந்திருக்க வேண்டியது அவசியம்.  அப்பொழுது மட்டுமே கிறிஸ்து நம்மைப் பிரகாசிக்கச் செய்ய  முடியும். கிறிஸ்து நம்மைப் பிரகாசிப்பிக்கும்போது மட்டுமே நம்மூலம் மற்றவர்கள் கிறிஸ்துவைக் கண்டுகொள்ளமுடியும். 

கிறிஸ்துவோடு நம்மை இணைத்துக்கொண்டு ஆவிக்குரிய வாழ்வில் வளருவோமானால் கிறிஸ்துவின் மெய்யான ஒளி நம்மேல் துலங்கும். இதனையே, "அப்பொழுது கிறிஸ்து உன்னைப் பிரகாசிப்பிப்பாரென்று சொல்லியிருக்கிறார்." என்கின்றார் பவுல்.  "ஆகையால், மற்றவர்கள் தூங்குகிறதுபோல நாம் தூங்காமல், விழித்துக்கொண்டு தெளிந்தவர்களாயிருக்கக்கடவோம்." ( 1 தெசலோனிக்கேயர் 5 : 6 )

தேவனுடைய வீடாகிய நமது உடலும் ஆவிக்குரிய வாழ்க்கையும் விழிப்புள்ளதாகவும் உயிருள்ளதாகவும் இருக்கவேண்டியது அவசியம். ஏனெனில் வீட்டு எஜமான் எப்போது வருவார் என்று நமக்குத் தெரியாது.  "நீங்கள் நினையாதவேளையில் அவன் வந்து, உங்களைத் தூங்குகிறவர்களாகக் கண்டுபிடியாதபடிக்கு விழித்திருங்கள்." ( மாற்கு 13 : 36 ) என்கின்றார் ஆண்டவராகிய இயேசு கிறிஸ்து. ஒரு வகுப்பறையில் மாணவன் எப்போதும் தூங்கிக்கொண்டு இருப்பானென்றால் அவனால் எப்படித் தேர்வைச் சிறப்பாகச் சந்திக்கமுடியும்? 

நமது உடலானது பலவீனமானதுதான்; ஆனால் நமது ஆவி உற்சாகமுள்ளதாக இருக்கட்டும். உற்சாகமுள்ள ஆவியினால் நாம் செய்யும் விண்ணப்பங்களை தேவன் ஏற்றுக்கொள்வார். நமக்குப் பெலன் தருவார். எனவேதான்,  "நீங்கள் சோதனைக்குட்படாதபடிக்கு விழித்திருந்து ஜெபம்பண்ணுங்கள். ஆவி உற்சாகமுள்ளதுதான், மாம்சமோ பலவீனமுள்ளது என்றார்." ( மாற்கு 14 : 38 ) இயேசு கிறிஸ்து. தூங்குகின்ற நாம் விழித்து மரித்தோரை விட்டு எழுந்திருப்போம்,  அப்பொழுது கிறிஸ்து நம்மைப் பிரகாசிப்பிப்பார். 

தேவ செய்தி :- சகோ. எம். ஜியோ பிரகாஷ்      

“Inside the Seeds” 🌳

Scripture Meditation No. 1718
AATHAVAN – Tuesday, 21 October 2025

“For this reason, it says, ‘Awake, sleeper, And arise from the dead, And Christ will shine on you.’” (Ephesians 5:14, NASB)

If our thoughts are only fixed on worldly matters, striving merely for earthly things without any spiritual reflection, we are as those dwelling in darkness. Our lives will not benefit anyone. The Apostle Paul describes living without spiritual awareness—focused only on worldly affairs—as being asleep or spiritually dead. He urges us to rise from that slumber, assuring that when we awaken, the Lord will shine His light upon us.

Excessive attachment to worldly comfort leads to ruin. If one prioritizes sleep and neglects daily responsibilities, poverty will soon follow. As Proverbs warns:

“...Drowsiness will clothe one with rags.” (Proverbs 23:21, NASB)

That is, if we remain lazy and indulge in sleep, we will not even have proper clothing to wear, but end up wrapped in rags.

Similarly, in our spiritual lives, we are not called to sleep but to stay awake, active, and prepared to meet Christ when He comes. That is why Jesus said:

“Therefore, stay alert—for you do not know when the master of the house is coming, whether in the evening, at midnight, when the rooster crows, or in the morning.”
(Mark 13:35, NASB)

Paul also compares those without spiritual awareness to people of the night, while those who live in the Spirit he calls people of the day:

“For those who sleep, sleep at night, and those who are drunk, get drunk at night. But since we are of the day, let’s be sober, having put on the breastplate of faith and love, and as a helmet, the hope of salvation.” (1 Thessalonians 5:7–8, NASB)

To live without spiritual thought is to be alive yet dead. Therefore, we must awaken from our spiritual slumber and rise from among the dead. Only then can Christ make us shine. When Christ shines on us, others will see Christ through us.

When we unite ourselves with Christ and grow in our spiritual life, His true light will radiate through us. As Paul affirms, “And Christ will shine on you.” Hence, “So then, let’s not sleep as others do, but let’s be alert and sober.” (1 Thessalonians 5:6, NASB)

Our bodies, which are the temple of God, and our spiritual life must remain awake and alive. For we do not know when the Master will return. Jesus Himself warned:

“Stay alert, so that He does not come suddenly and find you asleep.” (Mark 13:36, NASB) If a student keeps sleeping in class, how can he perform well in the examination? Likewise, we must not sleep through our spiritual duties.

Our body may be weak, but our spirit must remain fervent. A zealous spirit makes our prayers acceptable to God, who strengthens us. Thus Jesus said:

“Keep watching and praying, so that you will not come into temptation; the spirit is willing, but the flesh is weak.” (Mark 14:38, NASB)

Let us therefore awake from our sleep and rise from among the dead, so that Christ may shine upon us.

📖 God’s Message: Bro. M. Geo Prakash