🦋 Meditation verse - 1 கொரிந்தியர் 7 : 17 / 1 Corinthians 7:17

 "விதைகளின் உள்ளே" 🌳 

வேதாகமத் தியானம் எண் - 1626                                           ஆதவன் 21.07.2025 திங்கள்             

"தேவன் அவனவனுக்குப் பகிர்ந்ததெப்படியோ, கர்த்தர் அவனவனை அழைத்ததெப்படியோ, அப்படியே அவனவன் நடக்கக்கடவன். எல்லாச் சபைகளிலேயும் இப்படியே திட்டம்பண்ணுகிறேன்." ( 1 கொரிந்தியர் 7 : 17 )

தேவன் நம் ஒவ்வொருவரையும் ஒவ்வொருவிதமாகவும் வெவ்வேறு நோக்கத்துக்காகவும் படைத்துள்ளார்.  எனவே, நமக்கு நியமிக்கப்பட்டப்  பணியை அறிந்து அதனை நாம் சிறப்பாகச் செய்யவேண்டும். இதுவே தேவனது சித்தம். ஆனால் நம்மில் பலரும் மற்றவர்களோடு தங்களை ஒப்பிட்டு வாழ்பவர்களாக இருக்கின்றனர்.  இப்படி ஒப்பிடாமல்,  அவனவனுக்குப் பகிர்ந்ததெப்படியோ, கர்த்தர் அவனவனை அழைத்ததெப்படியோ, அப்படியே அவனவன் நடக்கக்கடவன் என்கின்றார் பவுல்.  

இதனை அப்போஸ்தலரான பவுல் உடலின் உறுப்புகளைக்கொண்டு "நீங்களே கிறிஸ்துவின் சரீரமாயும், தனித்தனியே அவயவங்களாயுமிருக்கிறீர்கள்." ( 1 கொரிந்தியர் 12 : 27 ) என்று கூறியுள்ளதை நாம் அறிவோம். எல்லா உறுப்புகளும் ஒரே வேலையைச் செய்வதில்லை. அதுபோல நம்மிலும் ஒவ்வொருவருக்கும் தேவனால் நியமிக்கப்பட்டப்  பணிகள் உண்டு. 

இன்று ஆவிக்குரிய காரியங்களிலும், உலகக் காரியங்களிலும் பலர் மற்றவர்களையேக்  கவனித்து அவர்களைபோலத் தாங்களும் மாறவேண்டுமென்றும் எண்ணிக்கொண்டு செயல்படுகின்றனர். இதுவே போட்டிகளும் பொறாமைகளும் எழுவதற்குக் காரணமாக இருக்கின்றது. இதனை நாம் தவிர்க்கவேண்டுமென்று அப்போஸ்தலரான பவுல் கூறுகின்றார். எனவேதான் அவர், "அவனவனுக்குப் பகிர்ந்ததெப்படியோ, கர்த்தர் அவனவனை அழைத்ததெப்படியோ, அப்படியே அவனவன் நடக்கக்கடவன்" என்று குறிப்பிடுகின்றார். 

இன்று கிறிஸ்தவ சமூகத்தில் காப்பியடித்தல் பல்வேறு விதங்களில் நடைபெற்றுக்கொண்டிருப்பதை நாம் காணலாம். குறிப்பாக கிறிஸ்தவ ஊழியங்களில் இது அதிகமாக  நடைபெற்றுக்கொண்டிருக்கின்றது.  நான் சாத்தான்குளத்தில் பணியாற்றியபோது ஒரு சகோதரனை எனக்கு ஒருவர் அறிமுகப்படுத்தினார். அவர் முதல்முதல் தன்னைபற்றி என்னிடம்  கூறிய வார்த்தைகள், "பிரதர், நான் DGS தினகரனைப்போலவே பாடுவேன்" என்பதுதான். ஆம், பிரபல ஊழியர்களைக் காப்பியடித்து அவர்களைப்போல பேசவும் பாடவும்  முயலுதல் பெருமையாக எண்ணப்படுகின்றது. ஆனால் அதுவே  இன்று கிறிஸ்தவ ஊழியங்களில் சாபக்கேடாக இருக்கின்றதை நாம் காணலாம். கிறிஸ்து இப்படி ஊழியர்களைக் காப்பியடிக்கக் கூறவில்லை. நாம் பின்பற்றவேண்டிய ஒரே மாதிரி கிறிஸ்துதான். 

"நீங்களே கிறிஸ்துவின் சரீரமாயும், தனித்தனியே அவயவங்களாயுமிருக்கிறீர்கள்." ( 1 கொரிந்தியர் 12 : 27 ) எனவே உங்களுக்குரிய கிறிஸ்தவ  கடமைகளை மட்டும் செய்யுங்கள் என்கின்றார் பவுல் அப்போஸ்தலர். மற்ற உறுப்புக்கள் செய்யும் பணியைச் செய்ய நாம் தேவையில்லை. 

இதுபோலவே மற்றவர்களுக்குரிய சொத்துக்கள்,  நகைகள், ஆடைகள் பதவிகள் போன்று நமக்கு இல்லையே  என்று கவலைப்பட்டு கலங்கும் மக்களும் உண்டு. இத்தகைய கவலை இருக்குமானால் நாம் ஆவிக்குரிய வாழ்வில் வளரவில்லை என்று பொருள். மட்டுமல்ல, இத்தகைய எண்ணமுள்ள ஆணும் பெண்ணும் ஆவிக்குரிய மேலான அனுபவங்களைப் பெற்றுக்கொள்ளவும் முடியாது. 

இவற்றை நாம் விட்டுவிடவேண்டுமானால், அமர்ந்திருந்து தேவன் நமக்குக் கொடுத்துள்ள நன்மைகளை எண்ணிப்பார்த்து அவற்றுக்கு நன்றிகூறப் பழகிடவேண்டும். அப்போது மட்டுமே தேவன் நம்மை ஆசீர்வதிக்கமுடியும். மேலும், கம்யூனிஸ்டுகள் மற்றும் விடுதலை இறையியல் சிந்தனையாளர்கள் விரும்புவதுபோல மேடுபள்ளங்கள் இல்லாத சமத்துவ சமுதாயம் நாட்டில் என்றைக்குமே மலர்ந்திட முடியாது. இயேசு கிறிஸ்துவும் அப்படி ஒரு சமுதாயத்தை உருவாக்கிட  உலகினில் வரவில்லை. மேடும்-பள்ளமும், இருளும்-வெளிச்சமும், குட்டையும்-நெட்டையும் இயற்கை. அவை இருப்பதால்தான் உலகம் இயங்கிக்கொண்டிருக்கின்றது. உதாரணமாக, உலக நிலப்பரப்பு மேடுபள்ளமற்ற  சமபூமியாகுமானால் முழுவதும் கடல்நீரால் நிறைந்து அழிந்து விடும். 

"எல்லா மனுஷரும் என்னைப்போலவே இருக்க விரும்புகிறேன். ஆகிலும் அவனவனுக்கு தேவனால் அருளப்பட்ட அவனவனுக்குரிய வரமுண்டு; அது ஒருவனுக்கு ஒருவிதமாயும், மற்றொருவனுக்கு வேறுவிதமாயும் இருக்கிறது." ( 1 கொரிந்தியர் 7 : 7 ) என்கின்றார் பவுல். அதாவது அவரது ஆசை எல்லோரும் அவரைப்போல மாறவேண்டும் என்பது. ஆனால் அவரே கூறுகின்றார்,  "அவனவனுக்கு தேவனால் அருளப்பட்ட அவனவனுக்குரிய வரமுண்டு; அது ஒருவனுக்கு ஒருவிதமாயும், மற்றொருவனுக்கு வேறுவிதமாயும் இருக்கிறது." என்று. ஆம் அதுதான் தேவ சித்தம். 

எனவே, மற்றவர்களைப் பார்க்காமல், காப்பியடிக்காமல், தேவன் நமக்குப் பகிர்ந்ததெப்படியோ, அவர் நம்மை அழைத்ததெப்படியோ, அப்படியே நடப்போம். நமக்கு அவர் தந்த அளவுக்குத்தான் நம்மிடம் அவர் இறுதிநாளில் கனக்குக் கேட்பார்.  "அறியாதவனாயிருந்து, அடிகளுக்கு ஏதுவானவைகளைச் செய்தவனோ, சில அடிகள் அடிக்கப்படுவான். எவனிடத்தில் அதிகங்கொடுக்கப்படுகிறதோ அவனிடத்தில் அதிகங்கேட்கப்படும்" ( லுூக்கா 12 : 48 ) என்கின்றார் ஆண்டவராகிய இயேசு கிறிஸ்து. 

எனவே, மற்றவர்களை நோக்காமல், பொறாமை கொள்ளாமல்  "கர்த்தர் அவனவனை அழைத்ததெப்படியோ, அப்படியே அவனவன் நடக்கக்கடவன்." தேவன் நமக்குக் கொடுத்துள்ள தாலந்துகளை பயனுள்ளவையாகப் பயன்படுத்துவோம். 

தேவ செய்தி :- சகோ. எம். ஜியோ பிரகாஷ்               

"Inside the Seeds" 🌳
Scripture Meditation No. 1626
AATHAVAN – Monday, 21 July 2025

“But as God hath distributed to every man, as the Lord hath called every one, so let him walk. And so ordain I in all churches.” — 1 Corinthians 7:17 (KJV)

God has created each of us uniquely and for a distinct purpose. Therefore, it is essential that we understand the task appointed to us and do it faithfully. This is God’s will. Yet, many of us tend to live by comparing ourselves with others. The apostle Paul instructs us not to compare, but to walk "as God hath distributed to every man, as the Lord hath called everyone."

Paul also explains this concept using the analogy of a body and its parts: “Now ye are the body of Christ, and members in particular.” — 1 Corinthians 12:27 (KJV)

Not every part of the body performs the same function. Likewise, each of us has a specific role appointed by God.

In both spiritual and worldly matters today, many are preoccupied with imitating others, striving to become like them. This spirit of comparison gives rise to envy and unhealthy competition. Paul warns us to avoid this tendency. That’s why he insists, “So let him walk…”—meaning, walk in the calling and gifting God has given you.

This habit of imitation is sadly very common in the Christian community today—especially in ministry. I recall an incident during my time serving in Sathankulam. A brother was introduced to me, and the very first thing he said was, “Brother, I sing just like DGS Dhinakaran.” Yes, it is often considered a great achievement to imitate famous ministers—mimicking their voice, speech, and style. But such mimicry has become a curse in ministry. Christ never asked His ministers to copy each other. The only model we are to follow is Christ Himself.

“Now ye are the body of Christ, and members in particular.” — 1 Corinthians 12:27 (KJV)

Therefore, Paul exhorts us to simply carry out our individual Christian duties. We don’t need to perform the tasks assigned to other members.

Likewise, some people become disheartened when they don’t possess the wealth, jewellery, clothing, or status that others have. If such thoughts dominate our minds, it is a sign that we are not growing spiritually. In fact, such individuals will never be able to receive higher spiritual experiences.

To overcome this mindset, we must sit quietly, count the blessings God has already given us, and cultivate a spirit of gratitude. Only then can God bless us more abundantly.

Moreover, the egalitarian society that communists and liberation theologians dream of—one without hierarchy—can never exist in reality. Jesus Christ did not come to establish such a structureless society either. Hills and valleys, light and darkness, short and tall—these are natural and essential contrasts that keep the world functioning. For instance, if the earth were completely flat, it would be submerged entirely in seawater and perish.

“For I would that all men were even as I myself. But every man hath his proper gift of God, one after this manner, and another after that.” — 1 Corinthians 7:7 (KJV)

Paul expresses his desire that everyone might be like him in devotion and service. Yet he recognizes that God has given each person a unique gift, distinct from others. This is the divine will.

So, let us stop looking at others or imitating them. Let us walk as God has distributed to each of us, and as He has called us. On the final day, God will only ask us to account for what He entrusted to us.

“…For unto whomsoever much is given, of him shall be much required…”— Luke 12:48 (KJV)

Let us not be envious or distracted by others. Instead, let us walk faithfully in our divine calling and make fruitful use of the talents God has given us.

✝️ Gospel Message by: Bro. M. Geo Prakash