வாலிபப் பிராயத்திலே / IN YOUTHFUL DAYS

ஆதவன் 🔥 932🌻 ஆகஸ்ட் 17, 2023 வியாழக்கிழமை

 "நீ உன் வாலிபப்பிராயத்திலே உன் சிருஷ்டிகரை நினை; தீங்குநாட்கள் வராததற்குமுன்னும், எனக்குப் பிரியமானவைகளல்ல என்று நீ சொல்லும் வருஷங்கள் சேராததற்குமுன்னும்.," ( பிரசங்கி 12 : 1 )

மனிதர்கள் பொதுவாக ஆன்மீக காரியங்களில் ஈடுபடுவது, பக்திச் செயல்பாடுகளில் ஈடுபடுவது போன்றவை  முதிர்ந்த வயதுக்குரிய செயல்பாடுகள் என்று எண்ணிக்கொள்கின்றனர். இளம் வயது, வாலிப வயது இவை இன்பமாக நாம் வாழக்கொடுக்கப்பட்டுள்ள நாட்கள் எனப் பலரும்  எண்ணிக்கொள்கின்றனர். ஆனால் இன்றைய வசனம்  "நீ உன் வாலிபப்பிராயத்திலே உன் சிருஷ்டிகரை நினை" என்று அறிவுறுத்துகின்றது. 

மேலும் துன்பங்கள் வரும்போது மட்டுமே கடவுளைத் தேடுவது, துன்பமான ஆண்டுகள் வாழ்வில் தொடரும்போது கடவுளை நினைப்பது என்று நாம் வாழாமல் வாலிப வயதிலேயே கடவுளைத் தேடுபவர்களாக வாழவேண்டும் என்று இன்றைய வசனம் கூறுகின்றது. இதனையே, "தீங்குநாட்கள் வராததற்குமுன்னும், எனக்குப் பிரியமானவைகளல்ல என்று நீ சொல்லும் வருஷங்கள் சேராததற்குமுன்னும்" என்று கூறப்பட்டுள்ளது. 

நம்மிடம் நன்கு பழுத்த மாம்பழம் இருக்கின்றது என வைத்துக்கொள்வோம். அந்தப் பழத்தை நன்றாக சுவைத்துத் தின்றுவிட்டு அதன் கொட்டையோடு ஒட்டியுள்ள கழிவுப் பகுதியை மட்டும் யாருக்காவது கொடுப்போமா? ஆம், இப்படியே நம்மில்  பலரும் இருக்கின்றோம். உடல் ஆரோக்கியமாக,  திடமாக இருக்கும்போது எத்தனையும்பற்றி கவலைப்படாமல் நன்றாக வாழ்க்கையை அனுபவித்துவிட்டு உடல் நலிந்து, நோயுற்று வாடியபின்பு கடவுளை நாடி அவருக்குத் தங்களை ஒப்படைக்கலாம் என்று முயலுகின்றோம்.  

அன்பானவர்களே, இன்றைய வசனத்தைத் தொடர்ந்து வாசிக்கும்போது,  "மண்ணானது தான் முன்னிருந்த பூமிக்குத் திரும்பி, ஆவி தன்னைத்தந்த தேவனிடத்திற்கு மறுபடியும் போகாததற்குமுன்னும், அவரை உன் வாலிபப்பிராயத்திலே நினை." ( பிரசங்கி 12 : 7 ) என்று கூறப்பட்டுள்ளதைப்  பார்க்கின்றோம். அதாவது, மண்ணான நமது உடல் தான் முன்பு இருந்த மண்ணுக்குத் திரும்புமுன்னும், நம்முடைய ஆவி தேவனிடம் திரும்புமுன்னும் நமது வாலிப வயதில் தேவனைத் தேடவேண்டும்.

வாலிப வயதில் தேவனைத் தேடுவதால் நாம் பாவ பழக்கங்களுக்குத் தப்பி பரிசுத்தமாக வாழமுடியும். யோசேப்பின் வாழ்க்கையைப் பாருங்கள், போத்திபாரின் மனைவி தன்னோடு அவனைப் பாவம்செய்ய பலமுறை அழைத்தபோதும் "........நான் இத்தனை பெரிய பொல்லாங்குக்கு உடன்பட்டு, தேவனுக்கு விரோதமாய்ப் பாவம் செய்வது எப்படி" ( ஆதியாகமம் 39 : 9 ) என்று கூறி யோசேப்பு தன்னைக் காத்துக்கொண்டான். அப்போது அவனுக்கு இருபது அல்லது இருபத்துமூன்று வயதுகள்தான் இருந்திருக்கும். இதற்குக் காரணம், தேவனோடுள்ள அவனது தனிப்பட்ட உறவு. அந்த இளம் வயதிலேயே அவன் தனது வாழ்க்கையில் தேவனை முன்னிறுதிப் பார்த்தான். அதனால் கர்த்தர் யோசேப்போடு இருந்தார் என்று நாம் வாசிக்கின்றோம் (ஆதியாகமம் 39:2) 

எனவே தேவனைத் தேடுவதற்கு முதிர்ந்த வயதுவரைக் காத்திருக்கவேண்டியது அவசியமில்லாதது. வாலிப வயதில் கர்த்தரைத் தேடும்போது நம்மை அவர் அதிக நாட்கள் பயன்படுத்த முடியம். மட்டுமல்ல, வாலிபத்தின் பாவ காரியங்களுக்கு விலகி பரிசுத்தமாய் வாழ முடியும். நமக்கு இப்போது வயதாகியிருந்தாலும் நமது குழந்தைகள், பேரக்குழந்தைகளை கர்த்தரை வாலிப வயதில் தேடுபவர்களாக வளரச்செய்திடுவோம்.

தேவ செய்தி:- ✍️ சகோ. எம். ஜியோ பிரகாஷ்   

                                IN YOUTHFUL DAYS

AATHAVAN 🔥 932🌻 Thursday, August 17, 2023

"Remember now thy Creator in the days of thy youth, while the evil days come not, nor the years draw nigh, when thou shalt say, I have no pleasure in them;" (Ecclesiastes 12: 1)

People generally think that engaging in spiritual activities and devotional activities are for mature people. Many people think that youth and adolescence are the days are given to live happily. But today's verse instructs, "Remember your Creator in your youth."

And today's verse says that we should live as those who seek God at an early age rather than seeking God only when suffering comes and thinking of God when the sad years continue in life. This is what has been said, “while the evil days come not, nor the years draw nigh, when thou shalt say, I have no pleasure in them"

Suppose we have a ripe mango. Shall we eat the fruit tasting it well and give only the waste part attached to the nut to someone? Yes, many of us are like this. When the body is healthy and strong, we enjoy life well without worrying about anything, and when the body is weak, sick and withered, we try to seek God and surrender ourselves to Him.

Beloved, as we continue reading today's verse it is said, “Then shall the dust return to the earth as it was: and the spirit shall return unto God who gave it." (Ecclesiastes 12: 7) That is to say, before our dusty body returns to the dust it was before, and before our spirit returns to God, we must seek God in our teenage years.

By seeking God in our youth, we can avoid sinful habits and live a holy life. Look at the life of Joseph, even when Potiphar's wife insisted him to sin with her several times, Joseph defended himself by saying "... how then can I do this great wickedness, and sin against God?" (Genesis 39: 9) He would have been only twenty or twenty-three years old then. This is because of his personal relationship with God at that young age, he envisioned God in his life. And so, we read that the Lord was with Joseph (Genesis 39:2).

Therefore, it is not necessary to wait till adulthood to seek God. When we seek the Lord in our youth, He can use us more years. Not only that, we can stay away from the sinful things of youth and live a holy life. Even though we are old now, let us make our children and grandchildren grow up to be seekers of the Lord in their youth.

God’s Message:- ✍️ Bro. M. Geo Prakash