உங்கள் வழிகளைச் சீர்ப்படுத்துங்கள் / AMEND YOUR WAYS

 'ஆதவன்' வேதாகமத் தியானம் - எண்:- 1,016,            நவம்பர் 09, 2023 வியாழக்கிழமை 

"இஸ்ரவேலின் தேவனாகிய சேனைகளின் கர்த்தர் சொல்லுகிறார்: உங்கள் வழிகளையும் உங்கள் கிரியைகளையும் சீர்ப்படுத்துங்கள், அப்பொழுது உங்களை இந்த ஸ்தலத்திலே குடியிருக்கப்பண்ணுவேன்." ( எரேமியா 7 : 3 )

நமது தேவன் பாவங்களை மன்னிக்கின்றவர் என்றாலும் மன்னிப்புக் கேட்பதை மட்டும் அவர் கருத்தில் கொள்வதில்லை. நமது வழிகளை நாம் சீர்படுத்தவேண்டுமென்று எதிர்பார்க்கின்றார். அதனையே இன்றைய தியான வசனத்தில்,  "உங்கள் வழிகளையும் உங்கள் கிரியைகளையும் சீர்ப்படுத்துங்கள், அப்பொழுது உங்களை இந்த ஸ்தலத்திலே குடியிருக்கப்பண்ணுவேன்" என்று கூறப்பட்டுள்ளது. 

ஒரு முறை பிறமத நண்பர் ஒருவர் என்னிடம், " கிறிஸ்தவத்தில் மன்னிப்பு பற்றி அதிகம் கூறப்பட்டுள்ளது. பாவம் செய்துவிட்டு மன்னிப்பும் பெறலாம் என்பது எப்படி நியாயமாக இருக்க முடியும்" என்று கேட்டார். நான் அவரிடம் கூறினேன், "பாவம் செய்துவிட்டு மன்னிப்பு பெறுவது ஒரு சடங்கல்ல; மாறாக அது ஒரு மனம் மாறுதல். இனிமேல் இப்படிப்பட்டப் பாவத்தை நான் செய்யமாட்டேன் என்று மனஸ்தாபப்பட்டு உறுதியெடுப்பது. அந்த உறுதியில் நிலைத்திருக்கும் காரியங்களை செய்வது."

வேதாகமத்தில் சகேயு எனும் ஒரு மனிதனைக்குறித்து நாம் வாசிக்கின்றோம். இந்த சகேயு வரி வசூலிப்பவர்களின் தலைவன். அநியாயமாக வரி வசூலித்து சொத்துச் சேர்த்தவன். ஆனால் அவன் இயேசு கிறிஸ்துவிடம் வந்தபோது, "ஆண்டவரே, என் ஆஸ்திகளில் பாதியை ஏழைகளுக்குக் கொடுக்கிறேன், நான் ஒருவனிடத்தில் எதையாகிலும் அநியாயமாய் வாங்கினதுண்டானால், நாலத்தனையாகத் திரும்பச் செலுத்துகிறேன் என்றான்." ( லுூக்கா 19 : 8 ) ஆம், செய்த தவறை உணர்ந்து அதற்குக் கைமாறுசெய்யத் துணிந்தான். 

இதுபோன்ற செயல்களையே இன்றைய வசனத்தில் உங்கள் வழிகளையும் உங்கள் கிரியைகளையும் சீர்ப்படுத்துங்கள் என்று கூறப்பட்டுள்ளது. நாம் செய்த தவறுகளை உணர்வது மட்டுமல்ல, கூடுமானவரை பாதிக்கப்பட்டவருக்கு கைமாறு செய்வது. அல்லது, அப்படிக் கைமாறு செய்ய முயலுவது. ஒருவரை நாம் ஏமாற்றியிருக்கலாம்,  அப்பொழுது திறந்த மனதுடன் அதனை அவரிடம் ஒத்துக்கொள்வது.  

நான் வெறுமனே ஜெபித்துக்கொண்டே இருப்பேன், தேவன் என்னை மன்னிக்கட்டும் என்று இருப்பது மேலான செயலல்ல. காரணம், இப்படி இருப்போமானால் நமது உள்ளான மனதில் மாற்றமில்லை என்று பொருள். ஒருவேளை பழைய சூழ்நிலை நமக்குத் திரும்புமானால் நாம் பழையதுபோன்ற தவறான வாழ்கையினையேத்  தொடருவோம் என்று பொருள். மட்டுமல்ல; நமது தேவன் அநியாயத்துக்குத் துணைபோகின்றார் என்றும் பொருளாகும்.

பாவங்களில் சாமாரிய பெண் செய்ததுபோன்ற பாவங்களும் உண்டு, சகேயு செய்த பாவம் போன்ற பாவமும் உண்டு.  விபச்சாரம் செய்தவள் அதனை நிறுத்தினால் போதும், ஆனால் பொருள், பணத்தை அபகரித்து, அல்லது லஞ்சம் வாங்கி வாழ்ந்தவர்கள் சகேயுபோல ஈடுகட்டவேண்டியதும் அவசியம். 

பிலேமோனுக்கு அப்போஸ்தலரான பவுல் எழுதிய நிருபத்தில் ஒநேசிமு எனும் ஒரு மனிதனைக் குறித்து எழுதுகின்றார். இந்த ஒநேசிமு தனது எஜமானாகிய பிலேமோனிடம் ஏமாற்றிவிட்டுத் தப்பிவந்த அவனது வேலைக்காரன். ஆனால் பவுல் மூலம் கிறிஸ்துவை அறிந்து ஏற்றுக்கொண்டான். அவனிடம் பணம் இல்லை. ஆனால் பவுல் அதனை அப்படியே விட்டுவிடவில்லை. அவன் ஏற்படுத்திய அநியாயத்தை அவனுக்காகத் தான் செலுத்தித் தீர்ப்பேன் என்று எழுதுகின்றார்.   

"அவன் உமக்கு யாதொரு அநியாயஞ்செய்ததும், உம்மிடத்தில் கடன்பட்டதும் உண்டானால், அதை என் கணக்கிலே வைத்துக்கொள்ளும். பவுலாகிய நான் இதை என் சொந்தக்கையாலே எழுதினேன், நான் அதைச் செலுத்தித் தீர்ப்பேன். " ( பிலேமோன் 1 : 18, 19 )

ஆம், நமது வழிகளையும் நமது கிரியைகளையும் சீர்ப்படுத்தும்போது நம்மை அவர் நன்மையுடன் குடியிருக்கப்பண்ணுவார்.  

தேவ செய்தி:- ✍️ சகோ. எம். ஜியோ பிரகாஷ்          

              AMEND YOUR WAYS

'AATHAVAN' BIBLE MEDITATION - No:- 1,016,                   Thursday, November 09, 2023

"Thus, saith the LORD of hosts, the God of Israel, Amend your ways and your doings, and I will cause you to dwell in this place." (Jeremiah 7: 3)

Although our God forgives sins, He does not consider only asking for forgiveness. He expects us to mend our ways. That is what is said in today's meditation verse, "Amend your ways and your doings, and I will cause you to dwell in this place."

A non-religious friend once asked me, "Christianity talks a lot about forgiveness. How can it be fair for one to sin and then be forgiven?" I told him, "Forgiveness after committing a sin is not a ritual; rather, it is a change of heart. Repenting and making a commitment not to commit such a sin again. Doing things that stick to that commitment."

In the Bible we read about a man named Zacchaeus. This man was the chief of the tax collectors. One who amazed wealth unjustly by collecting taxes. But when he came to Jesus Christ, he said, "Behold, Lord, the half of my goods I give to the poor; and if I have taken anything from any man by false accusation, I restore him fourfold." (Luke 19: 8)

It is these kinds of actions that are said in today's verse to mend your ways and your deeds. Not only do we realize the wrongs we have done, but we also have to rectify our false doings. Or, attempting to do so. We may have cheated someone and then admit it to him with an open mind.

I will simply keep on praying and asking God to forgive me, and it is no longer a pleasing  act for God. The reason is that if we stay like this, it means that there is no change in our inner mind. Perhaps if the old situation returns to us, it means that we will continue to live the same wrong life as before. Not only that; It also means that our God supports injustice.

There are sins like that of the Samaritan woman, and there are sins like that of Zacchaeus. It is enough for the adulterer to stop it, but it is necessary for those who live by embezzling material, money, or taking bribes to compensate it.

In his epistle to Philemon, the apostle Paul writes about a man named Onesimus. This Onesimus was a servant of his master, Philemon, who had betrayed him and escaped. But through Paul he came to know and accept Christ. Now, he has no money. But Paul didn't leave it at that. He writes that he will pay for the injustice he has caused.

"If he hath wronged thee, or oweth thee ought, put that on mine account; I Paul have written it with mine own hand, I will repay it:" (Philemon 1: 18,19)

Yes, God will make us dwell in goodness as we mend our ways and our deeds.

God’s Message: - ✍️ Bro. M. Geo Prakash