🦋 Meditation verse - സെഫന്യാവ് 3:15

 ആധവൻ ധ്യാനം

നമ്പർ: 2076 | തീയതി: 15.10.2026

"യഹോവ നിന്റെ ശിക്ഷാവിധികളെ നീക്കി, നിന്റെ ശത്രുക്കളെ മാറ്റിക്കളഞ്ഞിരിക്കുന്നു; ഇസ്രായേലിന്റെ രാജാവായ യഹോവ നിന്റെ മധ്യേ ഉണ്ട്; ഇനി നീ ഒരു അനർത്ഥവും കാണുകയില്ല." (സെഫന്യാവ് 3:15)

ക്രിസ്തുവിനായി സ്വയം സമർപ്പിക്കുകയും അവിടുത്തേക്ക് പ്രസാദകരമായ ജീവിതം നയിക്കുകയും ചെയ്യുന്ന ജനത്തെ ദൈവം ഒരുനാളും ഉപേക്ഷിക്കുകയില്ല. കഷ്ടതകൾ നമ്മെ ആക്രമിക്കുന്നതായി തോന്നിയാലും, അവ നമ്മെ പൂർണ്ണമായി കീഴടക്കുകയില്ല. അതെ, "മനുഷ്യർക്കു സാധാരണയായുള്ളതല്ലാതെ ഒരു പരീക്ഷണവും നിങ്ങൾക്ക് നേരിട്ടിട്ടില്ല; ദൈവം വിശ്വസ്തനാകുന്നു; നിങ്ങളുടെ പ്രാപ്തിക്കുമീതെ പരീക്ഷിക്കപ്പെടുവാൻ അവിടുന്ന് അനുവദിക്കുകയില്ല; പരീക്ഷ സഹിക്കുവാൻ തക്കവണ്ണം പരീക്ഷണത്തോടൊപ്പം പോക്കുവഴിയും അവിടുന്ന് ഉണ്ടാക്കിത്തരും." (1 കൊരിന്ത്യർ 10:13)

ഇന്നത്തെ ധ്യാന വാക്യത്തിൽ ദൈവമക്കൾക്കായി ദൈവം അരുളിച്ചെയ്യുന്ന പ്രധാനപ്പെട്ട മൂന്ന് കാര്യങ്ങൾ നാം കാണുന്നു. അവ:

1. രാജാവായ യഹോവ നിന്റെ മധ്യേ ഉണ്ട്

2. അവിടുന്ന് നിന്റെ ശിക്ഷാവിധികളെ നീക്കുന്നു

3. ഇനി നീ ഒരു അനർത്ഥവും കാണുകയില്ല

അതായത്, നാം അവിടുത്തേക്ക് അനുയോജ്യമായ ജീവിതം നയിക്കുമ്പോൾ കർത്താവ് നമ്മോടുകൂടെയുണ്ട്. അവിടുന്ന് രാജാവായി നമ്മിൽ ഉള്ളതുകൊണ്ട് നമുക്ക് തികഞ്ഞ ആത്മവിശ്വാസത്തോടെ ഈ ലോകത്തിൽ ജീവിക്കുവാൻ സാധിക്കും. നമ്മുടെ രാജ്യത്തിന്റെ പ്രധാനമന്ത്രിയോ മുഖ്യമന്ത്രിയോ നമ്മോടുകൂടെയുണ്ടെങ്കിൽ അത് നമുക്ക് എത്ര വലിയ ശക്തിയാണ്!! അങ്ങനെയാണെങ്കിൽ, ഈ ലോകത്തിന്റെ മുഴുവൻ രാജാവായ ദൈവം നമ്മോടുകൂടെയിരിക്കുന്നത് നമുക്ക് എത്ര വലിയ ഭാഗ്യമാണ്!!!

തന്നെയുമല്ല, നമ്മിലുള്ള ക്രിസ്തു നിരന്തരം പ്രവർത്തിച്ചുകൊണ്ടിരിക്കുന്നു. അവിടുന്ന് നമ്മുടെ പാപ ശാപ കാര്യങ്ങളെ നമ്മിൽനിന്ന് നീക്കിക്കളയുന്നു. അതെ പ്രിയമുള്ളവരേ, ക്രിസ്തു നമ്മിലായിരിക്കുമ്പോൾ നാം പാപത്തിന് മരിച്ചവരായിത്തീരുന്നു. ഇതേക്കുറിച്ചാണ് അപ്പോസ്തലനായ പൗലൊസ്, "എന്നാൽ ക്രിസ്തു നിങ്ങളിലുണ്ടെങ്കിൽ, ശരീരം പാപം നിമിത്തം മരിച്ചതെങ്കിലും, ആത്മാവ് നീതി നിമിത്തം ജീവനുള്ളതാകുന്നു." (റോമർ 8:10) എന്ന് പ്രസ്താവിക്കുന്നത്.

അവസാനമായി ഇന്നത്തെ ധ്യാന വാക്യം പറയുന്നു: "ഇനി നീ ഒരു അനർത്ഥവും കാണുകയില്ല." അതായത്, ഇത്രയും നാൾ വിവിധ അനർത്ഥങ്ങൾ നമ്മെ പിന്തുടർന്നിരിക്കാം, എന്നാൽ ഇനി അത് തുടരുകയില്ല. കാരണം രാജാവ് നമ്മോടുകൂടെയുണ്ട്. "ഞാൻ നിന്നോടുകൂടെയുണ്ട്; നിനക്ക് കേടുവരുത്തുവാൻ ആരും നിന്റെമേൽ കൈവെക്കുകയില്ല; ഈ നഗരത്തിൽ എനിക്ക് വളരെ ജനമുണ്ട്" (അപ്പൊസ്തലപ്രവൃത്തികൾ 18:10) എന്ന് അപ്പോസ്തലനായ പൗലൊസിനോട് ദൈവം അരുളിച്ചെയ്തില്ലയോ? നമുക്ക് എതിരെയല്ല, മറിച്ച് നമുക്ക് അനുകൂലമായി പല മനുഷ്യരെയും ദൈവം എഴുന്നേൽപ്പിക്കും.

അപ്പോസ്തലനായ പത്രൊസും, "നന്മ ചെയ്യുന്നതിൽ നിങ്ങൾ ഉത്സാഹമുള്ളവരായാൽ നിങ്ങൾക്ക് ഉപദ്രവം ചെയ്യുന്നവൻ ആര്?" (1 പത്രൊസ് 3:13) എന്ന് ചോദിക്കുന്നു. ക്രിസ്തു നമ്മോടുകൂടെയിരിക്കുമ്പോൾ നാം പാപം ചെയ്യുകയില്ല, ദുഷ്ടപ്രവൃത്തികളിൽ ഏർപ്പെടുകയില്ല, നന്മയുടെ വഴിയിൽ മാത്രമേ നടക്കുകയുള്ളൂ. അതിനാൽ ആരും നമുക്ക് ഉപദ്രവം ചെയ്യുകയില്ല എന്നാണ് പത്രൊസ് പറയുന്നത്.

ക്രിസ്തുവിന് പ്രസാദമുള്ളവരായി ജീവിക്കുമ്പോൾ നമുക്ക് ലഭിക്കുന്ന അനുഗ്രഹങ്ങളാണ് ഇവ. ഈ ക്രിസ്തുവിനെ നമ്മിൽ സ്വീകരിച്ചു ജീവിക്കുവാൻ നാം പരിശ്രമിക്കാം; ദൈവാനുഗ്രഹങ്ങൾ പ്രാപിക്കാം.

✒ സഹോദരൻ എം. ജിയോ പ്രകാശ് ✒️