Christian Verses for Meditation - 2 கொரிந்தியர் 10: 17, 18 / 2 Corinthians 10:17–18

வேதாகமத் தியானம் - எண்:- 1,407

'ஆதவன்' டிசம்பர் 15, 2024. 💚ஞாயிற்றுக்கிழமை

"மேன்மைபாராட்டுகிறவன் கர்த்தரைக்குறித்தே மேன்மைபாராட்டக்கடவன். தன்னைத்தான் புகழுகிறவன் உத்தமனல்ல, கர்த்தரால் புகழப்படுகிறவனே உத்தமன்." (2 கொரிந்தியர் 10: 17, 18)

மேன்மைபாராட்டல் அல்லது பெருமை கொள்ளுதல் தேவனுக்குமுன் ஏற்புடைய செயலல்ல என்பதுபற்றி இன்றைய தியான வசனம் கூறுகின்றது. இந்த உலகினில் மனிதர்கள் தங்கள் பதவி, அழகு, செல்வாக்கு, அந்தஸ்து இவை குறித்து பெருமையுள்ளவர்களாக உள்ளனர். ஆனால் அப்போஸ்தலரான பவுல் இப்படி உலக செல்வங்களையும் அந்தஸ்துக்களையும் குறித்துப்  பெருமை கொள்பவன் நல்லவனாக இருக்கமுடியாது  என்று கூறுகின்றார். இதனையே அவர், "தன்னைத்தான் புகழுகிறவன் உத்தமனல்ல" என்று கூறுகின்றார்.  

இந்த உலகத்தில் மிகவும் மதிப்புமிக்கது கர்த்தரை வாழ்க்கையில் நாம் தனிப்பட்ட விதத்தில் அறிந்து அனுபவிப்பது. அதற்கு இணையானது உலகினில் எதுவுமில்லை. பெரிய பெரிய இறையியல் படிப்பு படித்தவர்களும் வேதாகமதில் ஆராய்ச்சிசெய்து முனைவர் பட்டம் பெற்றவர்களும் அறிந்திராத இறை அனுபவங்களை சாதாரண கூலித்தொழிலாளர்கள், கட்டுமானப் பணியாளர்கள் அனுபவித்துக்  கூறுவதை நான் கேட்டுள்ளேன்.  இதுவே மேன்மையாகும். 

இதனையே எரேமியா "மேன்மைபாராட்டுகிறவன் பூமியிலே கிருபையையும், நியாயத்தையும் நீதியையும் செய்கிற கர்த்தர் நான் என்று என்னை அறிந்து உணர்ந்திருக்கிறதைக்குறித்தே மேன்மைபாராட்டக்கடவன் என்று கர்த்தர் சொல்லுகிறார்; இவைகளின்மேல் பிரியமாயிருக்கிறேன் என்று கர்த்தர் சொல்லுகிறார்." ( எரேமியா 9: 24) என்று கூறுகின்றார். 

எனவே, கர்த்தரை அறிகின்ற அறிவு நமக்கு வேண்டுமென்று நாம் விரும்புவதும் அதனை அடைய முயல்வதுமே நாம் செய்யவேண்டியது. கர்த்தரை அறியும்போது உலகம் தரக்கூடாத மகிழ்ச்சி நம்மை நிரப்புகின்றது. எனவேதான் தாவீது, "அவர்களுக்குத் தானியமும் திராட்சைரசமும் பெருகியிருக்கிற காலத்தின் சந்தோஷத்தைப்பார்க்கிலும், அதிக சந்தோஷத்தை என் இருதயத்தில் தந்தீர்." ( சங்கீதம் 4 : 7) என்று மகிழ்ச்சியுடன் கூறுகின்றார். 

ஆம் அன்பானவர்களே, உலகத்தின் மேன்மை, பதவி, அழகு, செல்வாக்கு, அந்தஸ்து இவைகளால் கிடைக்காத மகிழ்ச்சி கர்த்தரை அறிகின்ற அறிவினால் கிடைக்கின்றது. எனவேதான் இன்றைய தியான  வசனம் "மேன்மைபாராட்டுகிறவன் கர்த்தரைக்குறித்தே மேன்மைபாராட்டக்கடவன்." என்று கூறுகின்றது.   தேவனால் உத்தமன், சன்மார்க்கன் என்று அழைக்கப்பட்ட யோபு, இருதயத்துக்கு ஏற்றவன் என்று புகழப்பட்ட தாவீது, தேவனுடைய தாசன், என் வீட்டில் எங்கும் உண்மையுள்ளவன். ( எண்ணாகமம் 12: 7) என்று புகழ்ப்பெற்ற மோசே எனக் கர்த்தரால் புகழப்பட்ட பலர் வேதாகமத்தில் உண்டு. இப்படி கர்த்தரால் புகழப்படுவதே நாம் உத்தமர்கள் என்பதற்கு அடையாளம். 

அரசியல்வாதிகள் தங்களைத் தாங்களே புகழ்ந்து போஸ்டர்கள் அச்சிட்டு தங்கள் சுய மகிமையை வெளிப்படுத்துவதுபோல கர்த்தருக்கு ஏற்புடையவர்கள் செய்யவேண்டியதில்லை. நமது கர்த்தராகிய இயேசு கிறிஸ்து வரும்போது அவருக்கு ஏற்றவர்களாக வாழும் நமக்கு அவர் புகழ் உண்டாகச் செய்வார். "ஆனதால், கர்த்தர் வருமளவும் நீங்கள் காலத்துக்குமுன்னே யாதொன்றைக்குறித்தும் தீர்ப்புச்சொல்லாதிருங்கள்; இருளில் மறைந்திருக்கிறவைகளை அவர் வெளியரங்கமாக்கி, இருதயங்களின் யோசனைகளையும் வெளிப்படுத்துவார்; அப்பொழுது அவனவனுக்குரிய புகழ்ச்சி தேவனால் உண்டாகும்." ( 1 கொரிந்தியர் 4 : 5 )

எனவே உலக ஆசீர்வாதங்களையோ மகிமையையோ, நமது பதவி, அந்தஸ்துகளையோ குறித்து மேன்மைபாராட்டாமல் நாம் கர்த்தரை அறிந்துள்ளோம் எனும் பெருமையே நமக்குப் போதும்.  நாம் கர்த்தரால் புகழப்படுவதே நமக்கு உத்தமம்.

தேவ செய்தி :- சகோ. எம். ஜியோ பிரகாஷ்                      

Scripture Meditation– No: 1,407

AATHAVAN December 15, 2024, Sunday

"But he that glorieth, let him glory in the Lord. For not he that commendeth himself is approved, but whom the Lord commendeth." (2 Corinthians 10:17–18)

This meditation emphasizes that boasting or glorifying oneself is not acceptable before God. In this world, people often boast about their position, beauty, influence, and status. However, Apostle Paul categorically states that boasting in such worldly possessions and status does not make a person righteous. He declares, "He that commendeth himself is not approved."

The greatest value in life is to know and experience the Lord personally. Nothing in this world can match that privilege. I have heard testimonies from simple labourers and construction workers who have had profound experiences of God—experiences that even those with advanced theological degrees or deep biblical studies may not have encountered. This is the true glory.

Jeremiah echoes this sentiment: "But let him that glorieth glory in this, that he understandeth and knoweth me, that I am the Lord which exercise lovingkindness, judgment, and righteousness, in the earth: for in these things I delight, saith the Lord."
(Jeremiah 9:24)

Therefore, our desire and effort should be directed toward knowing God. The joy that comes from knowing Him fills us with a satisfaction that the world cannot provide. As David declares:" Thou hast put gladness in my heart, more than in the time that their corn and their wine increased." (Psalm 4:7)

Yes, beloved, the joy that comes from knowing God surpasses all worldly accomplishments, positions, beauty, influence, or status. This is why today's meditation reminds us, "He that glorieth, let him glory in the Lord."

The Bible is filled with examples of people commended by God for their righteousness and faithfulness. Job was called blameless by God. David was described as a man after God’s own heart. Moses was recognized as a faithful servant in all God’s house (Numbers 12:7). Being commended by God is the mark of true righteousness.

Unlike politicians who print posters to promote their self-glory, those who desire to please the Lord must live humbly. When Jesus Christ returns, He will glorify those who are found faithful to Him. As the scripture says: "Therefore judge nothing before the time, until the Lord come, who both will bring to light the hidden things of darkness, and will make manifest the counsels of the hearts: and then shall every man have praise of God." (1 Corinthians 4:5)

Thus, let us not glory in worldly blessings, positions, or status. The privilege of knowing the Lord is sufficient for us. Being commended by God is our ultimate goal and reward.

Divine Message: Bro. M. Gio Prakash