நீதிமானாகிய லோத்து / LOT, THE RIGHTEOUS

ஆதவன் 🔥 986🌻 அக்டோபர் 10, 2023 செவ்வாய்க்கிழமை

"கர்த்தர் தேவபக்தியுள்ளவர்களைச் சோதனையினின்று இரட்சிக்கவும், அக்கிரமக்காரரை ஆக்கினைக்குள்ளானவர்களாக நியாயத்தீர்ப்பு நாளுக்கு வைக்கவும் அறிந்திருக்கிறார்." ( 2 பேதுரு 2 : 9 )

இன்றைய வசனம் அதிக விளக்கம் இல்லாமலேயே புரியக்கூடிய வசனம். அதாவது தேவன் தேவ பக்தியுள்ளவர்களை சோதனைகளிலிருந்து விடுவிக்கின்றார்; தங்கள் தவறுக்கு மனம் வருந்தி திருந்தாத அக்கிரமக்காரரை அழிகின்றார். 

அப்போஸ்தலரான பேதுரு இதனை விளக்க ஆதியாகமத்திலிருந்து லோத்துவின் வாழ்க்கையினை எடுத்துக்காட்டாகக் கூறுகின்றார். அதனையே இன்றைய வசனத்தின் முத்தின வசனத்தில் நாம், "நாள்தோறும் அவர்களுடைய அக்கிரமக்கிரியைகளைக் கண்டு கேட்டு நீதியுள்ள தன்னுடைய இருதயத்தில் வாதிக்கப்பட்ட நீதிமானாகிய லோத்தை அவர் இரட்சித்திருக்க;" ( 2 பேதுரு 2 : 8 ) என்று வாசிக்கின்றோம். 

சோதோம் கொமோரா நகரங்களில் பாவம் மிக அதிகமாக இருந்தது. குறிப்பாக, பாலியல் பாவங்கள். அங்குள்ள மனிதர்கள் ஆண் புணர்ச்சிக்காரர்களாக இருந்தனர். அந்தப் பாவங்களைக் கண்டும் கேட்டும் தன்னுடைய இருதயத்தில் வாதிக்கப்பட்ட நீதிமானாகிய  லோத்து என்று மேற்படி வசனத்தில் வாசிக்கின்றோம். இப்படிப் பாவம் அதிகரித்ததால் தேவன் அந்த நகரங்களை அழிந்திடத் தீர்மானித்தார். ஆனால் அங்கு நீதிமானாகிய லோத்து குடியிருந்தார்.  

எனவே, தேவன் நகரத்தை அழிக்க அனுப்பிய தூதர்கள் லோத்துவிடம் வந்து தேவனுடைய திட்டத்தைச் சொல்லி அங்கிருந்து வெளியேறச் சொன்னார்கள். மட்டுமல்ல, அவன்பொருட்டு  இரத்த சம்பந்தமான அவனது உறவினர்களையும் தேவன் காப்பாற்றத் சித்தம்  கொண்டார். எனவே, "அந்தப் புருஷர் லோத்தை நோக்கி: இவ்விடத்தில் இன்னும் உனக்கு யார் இருக்கிறார்கள்? மருமகனாவது, உன் குமாரராவது, உன் குமாரத்திகளாவது, பட்டணத்தில் உனக்குரிய எவர்களாவது இருந்தால், அவர்களை இந்த ஸ்தலத்திலிருந்து வெளியே அழைத்துக்கொண்டு போ. நாங்கள் இந்த ஸ்தலத்தை அழிக்கப்போகிறோம்; இவர்கள் கூக்குரல் கர்த்தருடைய சமூகத்தில் பெரிதாயிருக்கிறது; இதை அழிக்கக் கர்த்தர் எங்களை அனுப்பினார் என்றார்கள்." ( ஆதியாகமம் 19 : 12, 13 )

அன்பானவர்களே, ஒட்டுமொத்த நகரத்தையும் அழிக்க தேவன் முயலும்போது அங்கிருந்த ஒரு நீதிமானின் குடும்பத்தைத் தேவன் காப்பாற்ற முயலுகின்றதை நாம் பார்க்கின்றோம். எல்லோரும் செய்கின்றார்களே என்று நாமும் ஒரு தவறான பாவமான செயலை நாமும்   செய்யக்கூடாது  எனும் செய்தி இங்கு நமக்குத் தரப்படுகின்றது. 

ஒருவேளை நமது அண்டைவீட்டார், உறவினர்கள் தேவனுக்கு விரோதமான சில செயல்களைச் செய்யலாம்; அவர்கள் உலகச் செழிப்போடு நன்றாக இருக்கலாம். அதைப் பார்த்துவிட்டு நாமும், இப்படிபட்டக் காரியங்கள் செய்யும் அவர்கள் நன்றாகத்தானே இருக்கின்றார்கள், நாமும் அப்படிச் செய்வதில் தவறில்லையே என்று நம்மை நாமே ஏமாற்றிக்கொள்ளக்கூடாது. ஆம், இரண்டு பெரிய நகரங்களில் ஒரே ஒரு நீதிமானாகிய லோத்து மட்டுமே இருந்தான்; அழியாமல் காப்பாற்றப்பட்டான்.  

ஆம், எனவே தேவனது வார்த்தைகளை இருதயத்தில் இருத்தி  நம்மைக் காத்துக்கொள்வோம். கர்த்தர் தேவபக்தியுள்ளவர்களைச் சோதனையினின்று இரட்சிக்கவும், அக்கிரமக்காரரை ஆக்கினைக்குள்ளானவர்களாக நியாயத்தீர்ப்பு நாளுக்கு வைக்கவும் அறிந்திருக்கிறார். 

தேவ செய்தி:- ✍️ சகோ. எம். ஜியோ பிரகாஷ்     

          LOT,  THE RIGHTEOUS

AATHAVAN 🔥 986🌻 Tuesday, October 10, 2023

"The Lord knoweth how to deliver the godly out of temptations, and to reserve the unjust unto the day of judgment to be punished:" ( 2 Peter 2 : 9 )

Today's verse is a verse that can be understood without much explanation. That is, God frees the pious from trials; He destroys the wicked who do not repent of their mistakes.

The apostle Peter cites the example of Lot from Genesis to explain this. That is what we see in the previous verse of today's verse, "For that righteous man dwelling among them, in seeing and hearing, vexed his righteous soul from day to day with their unlawful deeds;" ( 2 Peter 2 : 8 )

Sin was rampant in the cities of Sodom and Gomorrah. Especially, sexual sins. The men there were homosexuals. In the above verse, we read that the righteous Lot was pained in his heart seeing and hearing those sins. God decided to destroy those cities because of the increase in sin. But there lived the righteous Lot.

So, the messengers God sent to destroy the city came to Lot and told him God's plan and asked him to get out of there. Not only that, but God willed to save his blood relatives for his sake. Therefore, the men said to Lot: "Hast thou here any besides? son in law, and thy sons, and thy daughters, and whatsoever thou hast in the city, bring them out of this place: For we will destroy this place, because the cry of them is waxen great before the face of the LORD; and the LORD hath sent us to destroy it.” (Genesis 19: 12, 13)

Beloved, when God tries to destroy an entire city, we see God trying to save a righteous family there. Here we are given the message that we should not commit a wrong and sinful act that everyone is doing.

Perhaps our neighbours and relatives may do some things against God; They may be fine with worldly prosperity. After seeing that, we should not deceive ourselves that those who do such things are doing well and hence that there is nothing wrong doing like them. Yes, there was only one righteous Lot in the two great cities; He was saved from perishing.

Yes, so let us guard ourselves with God's words in our hearts. The Lord knows how to save the godly from trial and to reserve the wicked for the day of judgment.

God’s Message:- ✍️ Bro. M. Geo Prakash